國安法將來會載入史書，因為立法喺香港獨立進程上起關鍵作用，而事實上，呢種關鍵作用正在於令又一批香港人必須面對中共本質就係殘暴嘅現實。越接近現實，人嘅認知經驗就需要調整，因為人類從來都唔可以逃避大自然同歷史施加於人類身上嘅不可抗力。當香港人意識到過去其實一直都寄生於華夏食人族歷史敘述之下，受他人障眼之術所蔽，從來未擁有自己嘅一套現實，大家就會開始發掘香港民族已經存在嘅證據，以終止離地失重之狀態，抗爭，只係重生嘅開始。
中共之殘暴，源於華夏食人文化之耳濡目染，而儒學作為華夏文化之核心價值，實為人性不斷向相殺相殘方向演化嘅推動力。然而，一個族群、一個社會之所以會任由註定滅絕人性之思想長期流動，族群自身絕對有無可推卸嘅責任。華夏之人本思想以無神論為基礎，自一開始就已經隱隱發出腐爛發臭氣味，會成為柏楊筆下之醬缸文化份屬必然，無奈大多數意識到華夏缺陷嘅有識之士，都只係觸及到問題嘅表象，而非結構同源頭，故此佢地亦始終無法指出，華夏文化之劣根要如何一刀斬斷。
然而，踏破鐵鞋無覓處，香港民族成為咗佢地耗費一生都追求無果嘅答案提示。香港民族天生神力，與眾不同，以獨立推翻中國，以正義消滅華夏，在於香港歷史自開埠起即與華夏分道揚鑣，力量累積已有百八年。香港成為有德之人嘅避風港，而有德之人則成為社會發展嘅基石，一代接一代，於是就蛻變成為國際大都會，與世界秩序極之貼近嘅先進城市，可見一個社會可唔可以趨向人類文明之前列位置，係視乎有德之人嘅多寡。當今中國之落後，正係源於華夏文化已經遠離人性太遠，以無數人命為人類文明驗證出人類道德淪喪之下限可以低落到打開地獄之門。
無可否認，香港仍然有好多人未知道獨立係勢在必行，但每當我代入佢地嘅時代視角，我又確實明白佢地點解會對共產黨心存恐懼，同埋無法相信人性本善——歸根究底，佢地都係遠離唔切食人文化，唔敢恢復人性，因為見識過地獄嘅陰影真係會跟人一世跟到落棺材，唔係單憑個人努力就可以瞬間明白寬容為何物。所以，我地香港民族初生代自然而然就可以講得出獨立，不費吹灰之力就睇得到人性嘅光輝，其實係由好多上一輩同香港先民用生命換返黎。上述嘅天生神力，要歸功於勇於逃離故鄉嘅香港先民，亦要歸功於終於學識一分耕耘就會有一分收穫嘅香港老人，更要歸功於意識到要將法治價值傳承畀小朋友嘅上一代人。佢地一直無法同華夏文化徹底切割，雖然置身自由香港，但身邊嘅華夏家人朋友一直透支佢地。如果唔係佢地勞心勞力，互相扶持，今時今日嘅我地唔會茁壯成長；如果唔係佢地以遊行示威方式伸張正義，創出過五十萬人上街嘅舊紀錄，十幾年後嘅我地亦未必會擦出二百萬動員力嘅新紀錄。
我無法想像喺一個家人都飽受威脅嘅環境之下，我會唔會如同中國人一樣生出自衛殺人之念，而不斷提防他人呢種心態又會唔會令我變得麻木不仁，所以有幸生於香港，我只敢盡我所能，將前人交付於我肩上嘅善良保持落去，為延續香港應得嘅安穩生活、開創香港小朋友應有嘅開闊未來而努力到底。我地可以免於恐懼咁去談論愛與和平，完全係由於已經有人先於我地戰勝內心恐懼，將華夏仇恨轉化成香港有愛，只係我地要到長大成人至後知後覺，意識到香港之所以遠勝中國，原來係因為香港就係一個有大人努力幫小朋友遮風擋雨嘅溫室。
香港人成日都引用「生於亂世，有種責任」自況，但其實事實一直都係相反，因為意識到世界之混亂已經係局面有所改變嘅結果，無畏無懼從來唔可以靠一人之力達成。人總係無法避開心中惡念，但心存惡念，就唔會建立到有愛嘅共同體，故此盡力克制惡念，恢復善性，正係建國之根本。要抑制黑暗，首先要由自己做起，要改變世界，就要以自身之精進去感召身邊人，因為只有如此堅定不移嘅人，至會有能力令身邊人領略到民族精神之強大力量，進而將香港變成主權國家，繼續向世界輸出獨一無二嘅香港精神。
從來無意空談香港精神，因為要有香港精神，必先要有所實踐，腳踏實地。今日係接收外界對香港民族輸出關心嘅好日子，更係向自己人輸出抗爭能量嘅大日子，各位同胞，街頭見。
Search